aPc 5:24
bRu 1:16; 1Sa 1:26
c1Sa 10:5; 2Ku 4:1, 38
dJos 3:16; 6:26
eJos 3:15
fRu 1:16
g1Ku 18:12; Ns 8:39; 1Sa 10:5
hPk 15:25; 2Ku 4:41; 6:6

2 Kings 2

Vantungah Elijah Kilato

1TOPA in pingpei-in van-tungah Elijah a laktoh kuanin Elijah le Elisha Gilgal pan tonkhawm uh hi. 2Elijah in Elisha kiangah, “Hih lai-ah na om in; TOPA in Bethel ah kei hong sawl hi,” a ci hi. a

Ahi hangin Elisha in, “TOPA nuntakna le nang nuntakna lo in ka cih inah nang kong nusia kei ding hi,” a ci hi. Tua ciangin Bethel ah a paisuk khawm uh hi. b

3 Bethel a kamsang honte Elisha kiangah pai uh a, “TOPA in tuni-in nang kiang panin na pu a lak ding na thei hiam?” ci-in a dong uh hi. c

Elisha in, “Thei mah ing, ahi hangin tua thu gen kei un,” ci-in a dawng hi.

4 Tua ciangin Elijah in ama kiangah, “Elisha hiah na om in; TOPA in Jericho ah kei hong sawl hi,” a ci hi. d

Tuateh, “TOPA nuntakna le nang nuntakna lo in ka cih inah, nang kong nusia kei ding hi,” ci-in a dawng hi. Tua ciangin Jericho ah a paikhawm uh hi.

5 Jericho a kamsang honte Elisha kiangah paito uh a, “TOPA in tuni-in nang kiang pan na pu a lak ding na thei hiam?” ci-in a dong uh hi.

Amah in, “Thei mah ing, ahi hangin tua thu gen kei un,” ci-in a dawng hi.

6 Tua ciangin Elijah in ama kiangah, “Hiah na om in TOPA in Jordan ah kei hong sawl hi,” a ci hi. e

Tuateh, “TOPA nuntakna le nang nuntakna lo-in ka cih inah, nang kong nusia kei ding hi,” ci-in a dawng hi. Tua ciangin amaute gel a tonkhawm uh hi. f

7 Kamsang sawmngate pai uh a, Elijah le Elisha Jordan gei-a a khawlna mun lam nga-in a gamla sim panin a gal-et uh hi. 8Elijah in a puantualpi la-a, zialin tuilak a satna hi. Veilam le taklam ah tui kikhen a, a nih un leikeu tungah a galkah uh hi.

9 A kantan khit uh ciangin Elijah in Elisha kiangah, “Nang kiang pan kei hong kilak ma-in nang ading bang hong hihsak ding ka hi hiam, hong gen in!” a ci hi.

Elisha in, “Na kha zah nih kei hong luahsak in,” ci-in a dawng hi.

10 Elijah in, “Na haksa khat nong ngen hi, ahi zongin nang kiang pan kei hong kilak nong muh leh nang ading hi hen - nong muh kei leh nang ading hi kei hen,” a ci hi.

11 Amaute tonkhawmin a kihoho laitakun, meikuang sakolleng khat le meikuang sakolte omvat a, amaute gel kikhen sakin pingpei khat sungah Elijah vantung ah paito hi. 12Elisha in tua mu a, “Ka pa! Ka pa! Israel sakollengte le sakol tuangte!” ci-in a kiko hi. Tuateh Elisha in amah a mu nawn kei hi. Tua ciangin ama puansilhte manin a botkek gawp hi.

13 Amah in Elijah tung pana kia puantualpi tawma kileh kikin Jordan gei-ah a ding hi. 14Tua ciangin ama tung pana kia puantualpi la a tua tawh tui a sat hi. “Elijah Pasian, TOPA aw, tu’n kaw’h om na hiam?” ci-in a dong hi. Tui a sat ciangin vei le takah kikhena amah a galkah hi.

15 A vil gige-a om Jericho a kamsang honte in, “Elijah kha Elisha tungah a tung hi,” a ci uh hi. Tuateh amah tawh kituak dingin pai uh a, ama mai-ah leilam nga-in a kun uh hi. 16Amaute in, “En in, ko na nasemte in ahi thei ding mi sawmnga ka nei uh hi. Amaute pai-in na topa zongsak in. TOPA Kha in amah domtoin mualtung khat ahikeh kuam sung khatah koih hi kha ding hi,” a ci uh hi. g

Elisha in, “Hi kei, amaute paisak kei un,” ci-in a dawng hi.

17 Ahi hangin amaute in a nialding a maizum dongin a ci teitei uh hi. Tua ciangin amah, “Amaute paisak un,” a ci hi. Tuateh mi sawmnga sawl uh a, ni thum sung a zon uh hangin a mu kei uh hi. 18Jericho a om Elisha kiangah amaute hong kilehkik uh ciangin amaute kiangah, “Pai kei un hong ci hi lo ka hiam?” a ci hi.

Tui Damsakna

19 Khuapi mite in Elisha kiangah, “En in, kote topa aw, na muh mah bangin hih khuapi omna mun a hoih hi, ahi hangin tui hoih lo-a, leitang ah bangmah a piang kei hi,” a ci uh hi.

20 Amah in, “Kuang-uk thak khat hong la unla a sungah ci koih un,” a ci hi. Tua ciangin amaute in a pia uh hi.

21 Tua ciangin amah tuinak ah pai-in a sungah ci theh a, “TOPA gen hih ahi hi: ‘Hih tui ka damsak zo hi. Tua in sihna piangsak kik nawn kei henla leitang punglosak kei hen,’ ci hi,” a ci hi. 22Tuateh Elisha gensa bangin tuni dong tua tui a lim den hi. h

Elisha Kizahpih

23 Tua lai panin Bethel ah Elisha a paito hi. Lampi-ah a pai laitakin khua sung panin khangno pawlkhat paikhia uh a, amah zahnuihsan uh hi. Amaute in, “Talkolhpa aw, paito in, Talkolhpa aw, paito in,” ci uh hi. 24Amah kihei-in amaute en a, TOPA minin a hamsiat hi. Tua ciangin singlak panin vompi nih paikhia a, khangno sawmli le nih a phuaigawp hi. 25Tuateh Carmel Vumah paisuak a, tua panin Samaria ah a ciah kik hi.

Copyright information for ZomZIV